ESNATU DINAMIKA

Plazaola Partzuergo Turistikoak bat egiten du ESNATU dinamikarekin. Apirilaren 14an, Orion aurkeztutako ESNATU dinamikan parte hartu zuen Partzuergoak, euskararen egoera iraultzeko arduratik sortutako ekimenean, hainbat eragileren laguntzarekin. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa.

Zentzu honetan, Plazaolak 3 konpromiso ezberdin hartzen ditu:

• Euskarari buruzko atal propioa sortzea webgunean (plazaola.eus).
• Turismo bulegoko bisitarien artean euskarazko hiztegi bat banatzea.
• Partzuergoko bazkideen artean euskararen erabilera handiagoa sustatzea.

UEMA

1991ko maiatzaren 5ean sortu zuten UEMA, 19 udalek, Aizarnazabalen egindako batzarrean. Harrezkero, Euskal Herri euskaldun baten alde lanean ari den erakunde publikoa da Udalerri Euskaldunen Mankomunitatea. Tamainaz zein izaeraz askotarikoak dira mankomunitatea osatzen duten udalak, baina guztiek badute elkartzen dituen zerbait: udalerri euskaldunak dira guztiak. Zehazki, UEMAko kide diren herri guztietan, biztanleen %70etik gora euskalduna da.